خطة كورسور لتعلم البرمجة من الصفر

السلام عليكم

لو انت لسه ماعندكش اي فكرة عن البرمجة وحابب تبدأ هاتواجهك مشاكل كتير جدا منها عدم وجود خطة واضحه تقدر عن طريقها انك تبدأ تتعلم وده بيأدي بيك غالبا للكسل او الملل بعدها بفترة قصيرة

هنا في موقع كورسور قررنا اننا نعمل مجموعة من الخطط تساعد الناس اللي عايزين يتعلموا مجالات مختلفة انه يبدأوا وفي نفس الوقت بنكون متابعين معاهم في جروباتنا علي فيسبوك في الاجابة عن اسئلتهم واستفساراتهم

اول خطة عملناها كانت خطة الجرافيك ديزاين تقدر تشوفها من هنا

اما الخطة اللي هانبدأ فيها النهارده ان شاء الله فهي خطة البرمجة , البرمجة هي احدي اكثر المجالات المطلوبة في العالم في الوقت الحالي , واحدي افضل المجالات من حيث دخل العاملين بها ...

في البداية عايز اقولك ان البرمجه مش مجال واحد , البرمجه مجموعه كبيره من المجالات , ومافيش مبرمج في العالم بيقدر انه يشتغل في اكتر من مجالاين فيهم نظرا لان المجالات دي بتطور مع الوقت و مش هاتقدر انك تتابع في مجال البرمجة الا لو ركزت في مجال واحد من اللي هانشرحهم هنا ...

اول خطوة في خطة كورسور لتعلم البرمجة

اولا ما المقصود بكلمة البرمجة

البرمجة هي وسيلة بتقدر عن طريقها انك تتواصل مع جهاز الكومبيوتر .. بفرض انك واقف مع شخص صيني وبتحاول تتحاور معاه فمستحيل تقدر تكلمه الا لو بتعرف تتكلم لغتة او بتلجأ لمترجم ..

جهاز الحاسب بتاعك مش بيتكلم لغة غير ( 0 , 1 ) فعلشان تقدر تتواصل معاه هاتضطر انك تتكلم بالصفر والواحد او انك تلجأ لمترجم وده اللي بنعمله ... العلماء لجأوا لمترجم اسمه assembler علشان يترجم مجموعه من الكلمات المعينة في لغة معينة الي لغة ال 0,1 فيقدر جهاز الحاسوب الخاص بيك انه يفهمه .. وبعدها تطور المترجم واللي هو في الاساس برنامج علي الكومبيوتر الي ان اصبح في وقتنا الحالي اسمه compiler وده اقوي وبيتعامل بمرونة اعلي كتير... و ده أدي ال خلق شيء اسمه high level languages .. ايه ده ؟! ..ال high level languages هي لغات المستوي الرفيع .. وهي بتحتوي علي كلمات انجليزية كتير تسهل عليك عملية التواصل مع الحاسوب كبديل عن 0,1 وبعدها بيترجم ال compiler كل كلمة بتكتبها لل 0,1 فيفهمها جهاز الكومبيوتر او الحاسوب ...

لغات البرمجة من المستوي الرفيع اكيد انت سمعت عنهم زي C , C++ , PHP ,JavaScript , Java وكتيير غيرهم...

ازاي بتتم عملية الترجمه دي ؟!

وازاي اساسا بيتكون بال 0,1 كلمات كاملة ؟! دي اسئلة اكيد انت بتفكر فيها دلوقتي وهاقولك علي إجابتهم حالا ...

بما انك خلاص فهمت معني كلمة برمجة .. ف انت دلوقتي جاهز انك تنتقل للمرحلة التانية وهي انك تفهم يعني اي أنظمة الترميز وازاي تحول بينهم , وايه هو الترميز الثنائي وازاي تجري عمليات حسابيه عليه وايه هي انواع انظمة الترميز التانية ؟! دي كلها اسئلة ممكن تظهرلك انها معقدة نوعا ما لكن هي سهلة وبسيطة جدا ان شاء الله ...

انصحك تقرأ كتاب مقدمة الي الخوارزميات ل د. السعدني هايساعدك كتير في البداية , تقدر تحمله من هنا

مش بس هاتفهم منه انظمة الترميز , انت كمان هاتفهم المقصود بالخوارزميات و ازاي تبدأ تفكر بطريقة برمجة ... الكتاب باللغة العربية ومناسب جدا للمبتدئين وهو اول خطوة في خطة كورسور لتعلم البرمجة ...

ثاني خطوة في خطة كورسور لتعلم البرمجة

انت كده عرفت المصطلحات الأساسية في عالم البرمجة
هي خطوة غير إجبارية لكن هاتضيفلك كتير لو اتعلمتها

كورس CS50

ده اقوي واكبر كورس في مجال البرمجيات في العالم مقدم من جامعة هارفارد - افضل جامعات العالم - ولا يتطلب اي خبرة او معرفة مسبقة بالبرمجة تماما ..

الكورس بيتم عرضه مجانا علي موقع EDx ولو محتاج الشهادة فهي مش غالية بحوالي 90 دولار وبعد الدعم المالي بتكون ب 10 دولار بس ..

هتلاقي كل اللينكات اللي هاتحتاجها للكورس هنا

الخطوة الثالثة في خطة كورسور لتعلم البرمجة

في الخطوة دي انت دلوقتي عندك إدراك كامل لمعني كلمة برمجة , ولو انت ذاكرت الخطوة رقم 2 يبقي انت عندك فكره كبيره عن كذا لغة برمجية .. دلوقتي انت هاتختار المجال اللي هاتبدأ فيه واحنا هنا هانشرحلك مقدمة كافية لكل مجال علشان نساعدك تختار صح بإذن الله ...

المجال رقم 1

برمجة تطبيقات سطح المكتب

اكيد استخدمت برامج الأوفيس زي الوورد والاكسيل والباوربوينت ودي امثلة واضحه جدا لبرمجة تطبيقات سطح المكتب

او برامج الانتي فايروس زي AVG او AVAST والأمثلة كتير بمجرد فقط ما تفتح قايمة start فكل البرامج اللي فيها تندرج تحت النوع ده من البرمجة ... لكن انت هنا هاتتعرف علي نوع جديد من البرامج واللي بتعتبر رائجه جدا في السوق العربي وهي برامج الإدارة مثل برنامج لإدارة ارباح احدي المولات او برنامج لحساب درجات الطلاب في الجامعات والامثلة كثيرة ..

ازاي تبدأ في المجال ده !؟

هنا هتلاقي شرح لخطة مذاكرة كاملة لمجال برمجة تطبيقات سطح المكتب

المجال رقم 2

برمجة تطبيقات الويب

في اللحظة دي انت بتقرأ المقال علي واحد من امثلة برمجة تطبيقات الويب ..وطبعا مواقع ذي اليوتيوب والفيسبوك وتويتر امثلة برضو للمجال ده ...

المجال ده هو واحد من اكثر المجالات انتشارا في العالم حسب احصائيات واحد من المواقع الرائدة في مجالات البرمجة وهانكلمك عليه في الخطوات الأخيره ان شاء الله موقع stack overflow , الإحصائية بتقول ان اكبر مجال بيشتغل فيه عدد من المبرمجين هو مجال برمجة تطبيقات الويب ..

تمام ! .. طب ايه المطلوب علشان تبدأ في المجال ده ؟!

تقدر تقرأ الخطة المخصصة لمجال برمجة مواقع وتطبيقات الويب من هنا

المجال رقم 3

برمجة تطبيقات الموبايل

امثلة لهذا النوع من البرمجة هو جميع التطبيقات التي تستخدمها علي تليفونك المحمول .. اكبر اسواق هذا النوع هو السوق الخاص بالاندرويد ويليه سوق الايفون APPLE ..
يعتبر البعض هذا المجال هو الاول في الترتيب من حيث المجالات الأكثر ربحية , لان كل ما عليك بعد تعلمه هو ان تقوم بإنشاء تطبيق لغرض معين ثم رفعه علي play store كمثال وتكلفك هذه الخطوة حوالي 25 دولار فقط ثم تحدد له سعر معين للتحميل او ان يكون تطبيقك مجاني وتعتمد في أرباحك علي الإعلانات ...
لتبدأ في مجال برمجة تطبيقات الموبايل يمكنك الدخول علي الخطة المخصصه به من هنا

واخير مبروك وصولك للسطر ده .. وماتنساش تنضم لجروبنا عل فيسبوك وصفحتنا علي الانستجرام

خطة كورسور لتعلم البرمجة من الصفر